KORONADAL CITY- Nagresulta sa pagkarekober sang nilibo ka punuan sang Marijuana plants ang ginkasa nga operasyon sang gintingob nga pwersa sang PNP, PDEA 12 kag AFP sa tri-boundaries sang Tampakan, South Cotabato, Kiblawan, Davao del Sur kag Columbio, Sultan Kudarat.
Suno kay PDEA 12 Regional Director Naravy Duquiatan, nga sa nasambit nga operasyon, target sang Tampakan PNP, Kiblawan PNP, Columbio PNP, PDEA 12, 27th IB kag 39th IB ang mga ginasiling nga Marijuana growers nga sanday Gugwelen Macandon kag Terso Macondon.
Sa nasambit man nga high impact operation narekober ang masobra 27,000 fully grown marijuana hills nga may balor nga masobra P5 million apang sa operasyon, nakapalagyo ang mga suspek nga Macondon.
Samtang sa separar naman nga operasyon sa Sitio Alyong, Brgy. Danlag, Tampakan, South Cotabato kag Brgy. Datalblal, Columbio Sultan Kudarat, nakumpiskar ang yara sa 11,500 fully grown marijuana hills nga may balor nga masobra P2 million apang wala natumod ang cultivator sini.
Gilayon naman nga ginbunot ang mga Marijuana plants kag ginguba sang mga otorida.
Kaso naman nga paglapas sa section 16 ukon Cultivation of Dangerous Drugs sang Article 2 sang Republic Act 9165 o Comprehensive Dangerous Drugs Act of 2002 ang igasang-at nga kaso batuk sa natumod nga mga suspetsado.
Nagpatigayon naman gilayon sang ceremonial burning sang marijuana ang mga otoridad.
