KORONADAL CITY– Ginakahadlukan nga madugangan pa ang damyos nga mapagkit sang malapnagon nga epekto sang El Niño sa probinsya sang North Cotabato.
Sa interbyu sang Bombo Radyo Koronadal kay Remedios Hernandez, Provincial Agriculturist sang North Cotabato nga nagalab-ot na sa halos katunga sa bilyon ang balor sang napagkit nga damyos ilabi na sa mga pananom nga palay kag mais makaligad nga makadeklarar na sang state of calamity ang mga banwa sang Alamada, Aleosan, Pikit, M’lang kag Tulunan.
Nahibaluan nga sa karun wala na sang mga mangunguma sa nasambit nga probinsya ang nagatanom sang mga palay kag mais kag ang mga nabilin na lamang nga paglaum amuh ang pila ka mga high value crops kasubong sang cacao, rubber kag lubi nga posible maigo man sang dry spell kun magadugay pa tubtob sa hunyo ang El Niño.
Kaangot sini nakatalana nga ipaidalom naman sa state of calamity ang bug-os nga North Cotabato bangud minilyon ang balor man sang damyos nga napagkit sa nagkalain-in nga mga banwa sa nasambit nga probinsya.
