KORONADAL CITY – Naglab-ot sa masobra 9,000 ka mga pulis kag militar ang ginpalapta sa bug-os nga region 12 para sa May 13, Midterm elections.
Ini ang ginkumpirmar ni Pol. Lt. Col. Aldrin Gonzales sa interbyu sang Bombo Radyo Korondal.
Suno kay Gonzales, ginpatigayon na ang send-off ceremony sang mga pulis nga magbantay sang seguridad para sa Midterm elections sa bug-os nga probinsya.
Yara sa 9,370 nga katapo sang Philippine National Police 12 kag militar sa nagkalain-lain nga probinsya sang North Cotabato lakip na ang Saranggani, South Cotabato, Sultan Kudarat kag North Cotabato.
Ginpangunahan mismo ni PRO 12 Regional Director Elesio Tam Rasco ang seremonya.
Nahibaluan nga 6,212 ka mga pulis halin mismo sa Region 12; 2,846 halin sa pwersa sang Armed Forces of the Philippines kag 312 naman sa National and Administrative support units.
Ang pagdeploy sang mga pulis kag militar ang kabahin sang security measure nga ginapatuman sang PNP 12 para sa eleksyon.
Yara sa masobra 200 naman ka mga katapo sang PNP ang preprado kag nahanas na bilang Electoral Board kun may magback-out nga manunudlo sa eleksyon.
