KORONADAL CITY- Ginabulubanta nga yara sa masobra 800 ka pamilya gikan sa tatlo ka mga barangay sa banwa sang Lambayong, Sultan Kudarat ang apektado sang baha bangud sa padayon nga pagbuhos sang mabaskog nga ulan.
Ini ang ginpahayag ni Sherwin De Guzman, Municipal Disaster Risk Reduction and Management Officer sang Lambayong sa interview sang Bombo Radyo Koronadal.
Suno kay De Guzman, una na nga naka-eksperiensiya sang baha ang Barangay Caridad kun diin yara sa 441 ka pamilya ang nangin apektado.
Pila sa mga pamilya nga ini ang nagbakwit sa evacuation enter nga ginpreparar sang barangay.
Gilayon naman nga nahatagan ang mga apektado nga pamilya sang inisyal nga bulig nagikan sa Local Government Unit (LGU)kag MSWDO.
Samtang, ang pinakabag-o nga nadugang sa mga apektado sang baha ang duha ka purok sa Barangay Seneben kun diin yatra sa masobra 200 ka panimalay ang ginsulod sang tubig-baha.
Magluwas sini, may yara man sang duha ka Purok sa Barangay Pinguiaman ang ginbahaan man kun diin yara sa masobra 200 ka pamilya ang nangin apektado.
Dugang pa ni De Guzman, ginahatagan nila priority sa mga ginabakwit nga residente ang mga buntis, kabataan kag katigulangan.
Sa karon, ginahibalo pa ang kabug-usan nga damyos sang baha.
Samtang, padayon naman nga ginapapreparar ang ini nga mga lugar nga ginakabig catch basin sang Sultan Kudarat ilabi na kun mag-awas ang tubig sa Allah river.
Kumpiyansa man ang opisyal nga preparado ang ila munisipyo sa pagresponder sa kalamidad apang kinahanglan sa gihapon sang kooperasyon sang katawhan.
