Madamo gihapon nga mga eskwelahan sa pungsod ang naapektuhan sang baha kag nagaserbe nga evacuation centers sang mga residente nga naglikas bangod sa bagyong Carina.
Tungod sini, nagaabot sa 738 ka mga eskwelahan sa pila ka mga rehiyon sa pungsod ang indi pa makasugod sang klase sa Hulyo 29, 2024.
Kalakip sa mga rehiyon nga ini amo ang Region 3, Region 7, Cordillera Administrative Region, kag pati na ang National Capital Region nga yara pa sa idalom sang State of Calamity.
Sa kasamtangan nga datos sang Department of Education, nagaabot sa masobra 200 ka mga eskwelahan ang nabahaan samtang may sobra 400 nga kasamtangan nga ginatineran sang mga bakwit.
Naglab-ot naman sa sobra 12k ka mga eskwelahan sa 65 ka mga dibisyon sa napulo ka rehiyon ang naapektuhan sang bagyong Carina.
Suno naman kay DepEd Sec. Sonny Angara, kon mahimo, indi dapat madelatar ang pagbukas sang klase agud indi maapektuhan ang edukasyon sang mga estudyante.
