KORONADAL CITY- Nagapabilin pa tubtob subong ang yara sa 575 nga indibidwal sang Brgy. Ned, Lake Sebu, South Cotabato makaligad nga magbakwit bangud sa kinagamo nga nagluntad sa Brgy. Molon, Palimbang, Sultan Kudarat tuga sang Rido.
Sa interbyu sang Bombo Radyo Koronadal kay Police Major Jardi Mont Sibal, hepe sang Lake Sebu PNP, ginkumpirmar sini ang numero sang mga bakwit nga yara sa ila nga banwa gikan sa 3 ka mga Sitio nga kaiping lamang sa Palimbang.
Dugang pa sini ang mga bakwit ang nagikan sa tatlo ka mga sitio nga ginalakipan sang Kumilat, Kisayan kag Molmol sa Brgy. Ned, Lake Sebu kun sa diin kadamuan sa ila ang temporaryo nga naga istar sa ila mga kakilala kag himata.
May mga napagkit man nga 50 ka mga bakwit sa nagkalain lain nga mga barangay sa Palimbang.
Base sa mga otoridad ang nasambit nga Rido ang nag ibwal sa tunga sang kasamtangan nga Brgy. Chairman sang Brgy. Molon nga ginkilala nga sanday kapitan Adam kag sang wala pa natumod nga opisyal sang nasambit nga barangay kun sa diin isa ka 18 anyos ang pilason sa pagpangluthang.
Sa karon mas ginpahugtan pa ang seguridad sa boundary sang Palimbang, Sultan Kudarat kag Brgy. Ned Lake Sebu, South Cotabato kasunod sang nasambit nga panghitabo.
