KORONADAL CITY – Naglab-ot sa masobra 50 ka pamilya ang naapektuhan sang pagpanalasa sang mabaskog nga hangin sa duha ka barangay sa banwa sang Surallah, South Cotabato.
Ini ang ginkumpirmar ni Mayor Pedro Matinong sa interview sang Bombo Radyo Koronadal.
Suno kay Matinong ang mga apektado nga pamilya ang ginalikapn sang 30 halin sa Barangay Colongulo kag 20 naman sa Barangay Moloy.
Kaangot sini, nagpanagtag gilayon ang pamunuan ang Provincial Disaster Risk Reduction and Management Council (PDRRMO) South Cotabato sang bulig sa mga pamilya nga naapektuhan.
Nakabaton ang mga pamilya sang hygiene kits, sleeping kits and foodpacks.
Madumduman nga ginpangunahan sang PDRRMO sang South Cotabato kaupod man ang Lokal nga gobyerno sang Surallah ang pagpanagtag sang bulig sa mga apektado nga pamilya sa diin kasagaran sa mga ini ang nagub-an sang sang puluy-an.
Una naman nga ginpasiguro ni Mayor Matinong nga may nakapain nga pundo ang banwa para sa mga apektado sang kalamidad.
Sa karon, ginahibalo pa ang kabug-usan nga damyos sang pagpanalasa sang mabaskog nga hangin sa mga puluy-an, pananom kag palangabuhian sang tagsa ka pamilya.
