Masobra 2,197 ka junior high school kag sobra 800 ka senior high school students sa Tampakan National High School ang napaidalom sang ginpahugtan nga security measures matapos makabaton ang buluthuan sang social media threat nga nag-mention sa ngalan sini.
Bangud sini, ginsuspende ang face-to-face classes kag ginpatuman ang modular distance learning bilang precautionary measure.
Sa exclusive interview sang Bombo Radyo Koronadal kay OIC Principal Rodel O. Gentapa sang Tampakan National High School, iya ginpahayag nga gilayon nga ginreport ang threat sa Schools Division Office sang South Cotabato, Disaster Risk Reduction and Management personnel kag PNP.
Antes mag-abot ang mga estudyante, nag-secure na ang kapulisan sa school vicinity.
Ginbuksan man ang isa lang ka gate kag naggamit sang duha ka metal detectors, samtang ginpabaskog ang presensya sang prefects kag guidance personnel.
Samtang, gin-upod sang mga otoridad ang isa ka 14-anyos nga Grade 9 student angot sa assessment kag counseling, apang wala pa makumpirmar nga siya ang nag-post sang gin-report nga threat.
Bangud sini, ginpanawagan sang school administration ang publiko nga indi magpalapta sang wala pa napamatud-an nga impormasyon kag gilayon i-report sa mga otoridad ang makaduluda nga mga post.
