KORONADAL CITY – Nagsaka pa sa masobra 300 mga pamilya ang nagbakwit kag nagapabilin subong sa evacuation center bangud sa nagapadayon nga engkwentro sang military kag terorista nga grupo sa boundary sang North Cotabato kag Maguindanao.
Suno sa 6th ID Kampilan Division, ginpahugtan pa sang Joint Task Force Central ang paglagas sa mga terorista kun sa diin target sang surgical strike ang grupo ni Shiek Esmail Abdulmalik alyas Kumander Abu Toraife sang Bangsamoro Islamic Freedom Fighters o BIFF-ISIS Inspired Group.
Magluwas sa grupo ni Toraife, ginalagas man sang militar ang anom nga mga dumuluong nga terorista nga yara subong sa BIFF.
Padayon sa gihapon ang air to ground assault sang militar sa Liguasan Delta kag SPMS Box sa Maguindanao.
Sa subong, yara sa 13 ka mga miyebro na sng BIFF ang napatay, madamo sa mga ini ang pilason kag isa ka suldado naman ang ginbawian sang kabuhi.
Nagahulat naman sang dugang nga bulig halin sa provincial government sang Maguindanao provincial ang mga pamilya nga nagbakwit.
