KORONADAL CITY – Yara na sa pag-inakop sang lokal nga pang-gobyerno sang Arakan sa probinsiya sang North Cotabato ang masobra 30 ka mga myembro sang kulto nga ginakabig nga “Tinagong Tinoohan ni Kulas” nga na-rescue sang mga otoridad sa kabukiran sang Mt. Mahuson Ridge.
Ini ang ginpahayag ni Leonardo Santillan Reovoca, Municipal Information Officer sang Arakan sa eksklusibo nga interbyu sang Bombo Radyo Koronadal.
Suno kay Reovoca, isa ka task group ang gilayon nga gindihon sang LGU-Arakan makaligad nagreklamo ang pamilya sang 3 ka napatay nga suno pa mga myembro sang kulto nga ginpabay-an kag wala ginlubong kun diin yara na sa state of decomposition ang mga ini.
Kalakip sa mga ginpaidalom sa psychological de-briefing kag medical treatment ang ginatudlo nga lider sang kulto nga si Nicolas Canonigo alyas Kulas kag pamilya sini.
Gina insister sang opisyal nga kulto ang gindihon ni Kulas sa kabukiran bangud sa ila nga ginahimo kag ginapatihan nga pagasalbaron suno pa ang ga ini sang ila nga Ginoo.
Nahibaluan nga bulan sang Abril pa sadtong nakaligad nga tuig nag-umpisa nga magtinir sa lasang ang mga ini kag bangud sa kagutom, katugnaw kag wala sang maayo nga ginaistaran napatay sa balati-an ang 3 ka kaupdanan sang mga ini.
Samtang,madamo naman suno pa sang bersyon ang nagaguwa angot sa kulto nga ini suno kay Leah Labrador, IP affairs coordinator sang probinsya sang North Cotabato sa ekslusibo nga interbyu sang Bombo Radyo Koronadal.
Suno kay Labrador, may yara suno pa sang naguwa nga balita nga kun sin-o ang makasarang nga magtinir ukon magsaka sa kabukiran makabaton sang P50,000 kag sinako nga bugas.
Nahibaluan nga manug-isa katuig na ang nasambit nga grupo subong nga Marso kun diin ginapakilala pa ni Kulas ang bata sini nga dalaga nga buntis nga si Birhen Maria.
Nahibaluan nga halos mga Ip’s ang na-recruit ni Kulas nga mag-upod sa kulto sini.
