KORONADAL CITY – Naglab-ot sa masobra 30 ka mga loose firearms ang boluntaryo nga ginsungka sang mga ginapatihan nga myembro sang private armed groups sa banwa sang Ampatuan, Maguindanao sa ila lokal nga gobyerno.
Suno kay 2nd Mechanized Battalion Commander Col. Alvin Iyog, pormal na ginturn-over sa ila sang Ampatuan LGU ang nasambit nga mga high powered firearms nga ginalakipan sang mga shotgun, M-79, M-1 garand rifle, cal. 45 kag cal, 38 pistols, kag 60mm Mortar Launcher.
Nagapati si Iyog nga resulta ini sang ila mas ginpabaskog nga Balik-Baril program sa bulig sang mga LGUs kag PNP.
Nahibaluan nga yara sa 300 ka mga armas na ang yara sa kustodiya sa karon sang Army’s 2nd Mechanized Battalion kag naglab-ot naman sa 1,500 loose firearms ang uyat sang Army’s 6th Infantry Division humalin pa sang nakaligad nga tuig.
Kadungan sini, ginpasiguro naman sang opisyal nga seryoso ang kampanya sang gobyerbo batuk sa loose firearms bilang preparasyon sa nagahilapit nga eleksyon sa Mayo.
