KORONADAL CITY – Nag-abot sa nasobra 30 ka panimalay ang apektado sang pagbaha bangud sa mabaskog nga pagbuhos sang ulan kagab-i sag Brgy.Topland, Koronadal City.
Ini ang ginkumpirmar ni Barangay Kagawad Greta Cerilos sa interview sang Bombo Radyo Koronadal.
Suno kay Kagawad Cerilos, tuman nga naapektuhan sang baha ang mga residente nga nagaistar sa palengke ukon mga myembro sang Topland Market Associaton (TOMAVA) sa bahin sang Purok Lower Libertad.
Matapos nga magpanalasa ang baha, gilayon nga nagpatigayon ang barangay sang pagkuha sang mga rorok sa isa ka box culvert sa tabok sang Marbel 7 National High School.
Ang nakit-an nga rason man sang pagbaha amo ang pag-awas sang tubig halin sa Taplan River bangud sa pagbuhos sang makusog nga ulan.
Pila pa sa mga lugar nga apektado sang baha ang Purok Bagong Sikat, Upper kag Lower Mabuhay, Purok Paghili-usa, Purok Center, Purok Malipayon kag Purok Katipunan.
Naguba man ang dalan sa bahin sang Sitio Mani nga ginaagyan sang katawhan padulong sa Barangay Esperanza, Koronadal City.
Sa karon, naghatag na sila sang inisyal nga bulig sa mga apektado nga pamilya.
Padayon naman ang panawagan sang mga opisyal nga maghalong kag mangin vigilante sa tanan nga tion ilabi na kun mabaskog ang ulan.
