KORONADAL CITY – Nagpahayag sang suporta ang mga pumuluyo sa probinsiya sang Sultan Kudarat kag Maguindanao sa ginaduso nga Federal form of government sang Duterte administration.
Naglab-ot sa masobra 25mil ang nagtambong sa ginpatigayon nga pagtililipon sa Provincial Capitol Gymnasium, Isulan, Sultan Kudarat nga nagsugod alas-9 kaina sang aga.
Suno kay Governor Pax Mangudadatu, ang Partido Tinig ng Masa (PTM) ang nagasuporta sa Tapang kag Malasakit Alliance for Better Philippines.
Ginpatigayon ang amo nga aktibidad agud mapahibalo man sa mga pumuluyo sang Sultan Kudarat kag Maguindanao kun ano ang Federalismo kag ang maayo nga matuga sini.
Nahibaluan nga nagasuksok pa sang halos pula nga panapton ang mga nagtambong sa aktibidad gikan sa nagkalain-lain nga banwa sa probinsiya sang Sultan Kudarat kag Maguindanao.
Nagalaum naman ang mga nagtambong sa aktibidad nga mangin dalan ang Federalismo sa pag-isa sang mga Muslim, Lumad kag Kristiyano agud nga malab-ot man ang kalinong kag pag-umwad sang pungsod.
