KORONADAL CITY – Nagalab-ot sa masobra 200 nga benepisyaryo sang Social Amelioration Program (SAP) subsidy halin sa gobyerno sang ikaduha nga bes nga nakabaton sang nasambit nga benepisyo.
Ini ang ginbuyagyag ni Department of Social Welfare and Development (DSWD) Regional director Cezario Joel Espejo makaligad ang ila pagtutok sa pagpanagtag sang nasambit nga cash assistance.
Suno kay Espejo, nagaguwa nga yara sa kabug-osan nga 209 ka tawo ang nakabaton sang duha ka bes nga P5,000 cash assistance halin sa mga local government units.
Ginpaathag ni Espejo nga benepisyaryo man suno pa sang Pantawid Pamilyang Pilipino Program (4Ps) ang iban sa mga nakabaton sini.
Ang nasambit nga numero ang halin sa nagkalain-lain nga barangay sa rehiyon kun sa diin nakalista ang ila mga pangalan.
Sa subong nasumiter na nila ini sa Criminal Investigation and Detection Group (CIDG)-12 para sa imbestigasyon kag paglakip man sang kaso.
Nagbpaandam si Espejo nga posible nga magapangatubang sa kaso nga Republic Act 11469 ukon Bayanihan to Heal as One Act ang mga nasambit nga nagbayolar sa guidelines sa pag-release sang cash subsidy.
Sa datos sang CIDG-12 sang nakaligad nga semana, yara sa 21 ka tawo na ang nakasuhan nila sang estafa.
