KORONADAL CITY – Nagapadayon ang damage assessment sa banwa sang Sto. Nino, South Cotabato makaligad nga nangin apektado sang pagbaha tuga sang nag-awas nga dike bangud man sa pagbubo sang mabaskog nga ulan ang masobra 20 ka pamilya.
Sa interbyu sang Bombo Radyo Koronadal kay Mr. Bobet Fale, MDRRMO sang Sto. Nino South Cotabato, bangud sa tuman kabaskog nga bubo sang ulan nagresulta ini sang pag-awas sang tubig sa dike sa Brgy. Panay, Sto. Niño, South Cotabato, nga nagresulta sang pagbaha sang mga kaiping nga lugar.
Dugang pa ni Fale, naglab-ot ang pagbaha sa boundary sang Sto. Nino kag Sultan Kudarat.
Sa kabug-usan yara sa 24 ka mga pamilya ang nangin apektado sa pagbaha nga nagbakwit man.
Sa karon, nagapadayon ang clearing operation sa lugar ilabi na sa mga apektado sang pagbaha.
Nahibaluan nga nahatagan naman sang bulig sang LGU Sto. Nino ang mga pamilya nga apektado.
Kadungan sini, nagpanawagan man ang opisyal sa tanan nga maghalong ilabi na sa mga yara sa flash flood prone areas bangud sa padayon nga pagbubo sang ulan pag-abot sang kahapunanon tungod sa LPA kat ITCZ.
