KORONADAL CITY – Yara sa masobra isa ka libo nga indibidwal ang ginbakwit sa banwa sang Lambayong Sultan Kudarat bangud sa malapnagon nga pagbaha nga naeksperiensiyagan tuga sang wala untata nga pagbubo sang mabaskog nga ulan kun diin ginsulod sang tubig-baha ang mga kabalayan sang mga apektado nga residente.
Ini ang ginpahayag ni MDRRMO Sherwin De Guzman sang Lambayong Sultan Kudarat sa interbyu sang Bombo Radyo Koronadal.
Suno kay De Guzman, nagapabilin subong sa mga evacuation areas ang mga bakwit gikan sa 4 ka mga barangay nga ginakonsiderar nga mga downstream areas nga ginalakipan sang Barangay Tinumigues, Pinguiaman, Udtong kag Sadsalan.
Dugang pa sang opisyal, antes pa man ang pagbaha nagpatigayon na sila sang preemptive measures sa mga residente kag madasig naman nga nagpadulong sa luwas nga lugar ang mga ini.
Samtang, may naguwa naman nga report nga may mga residente nga nagapanguha sang balabaw kag mara-mara agud kaunon.
Masuwerte naman nga wala sang may nareport nga napatay ukon residente nga pilason sa nasambit nga pagbaha.
Dugang pa ni De Guzman, normal na lamang suno pa ang kasubong sini nga hitabo sa ila nga banwa bangud nahibaluan nila nga catch basin sang mga baha ang ila nga lugar kun diin ulihi nga destinasyon sang tubig baha gikan sa Upper Valley areas sa South Cotabato.
Sa subong, nagapadayon ang Rapid Damage Assessment kag Needs Analysis sang MDRRMO Lambayong sa danyos nga ginbilin sang nasambit nga kalamidad
