KORONADAL CITY – Naglab-ot na sa siyam ka mga barangay ang apektado sang halos wala untat nga pag-ulan sa banwa sang Pikit, North Cotabato kun sa diin nagbakwit ang masobra 1,000 pamilya.
Base sa datos sang Pikit Municipal Disaster Risk Reduction and Management Office, apektado ang mga barangay sang Ginatilan, Takepan, Dalingaoen, Ladtingan, Balong, Nalapaan, Calawag, Bulod kag Batulawan nga tuman nga naapektohan sang pagbaha labi na nga lunsay yara sa low-lying areas ang mga ini.
Suno sa talatapan, nagpalala pa sa mga pag-ulan sa nasambit nga banwa ang pag-awas sang lebel sang tubig halin sa Rio Grande de Mindanao.
Bangud diri, temporaryo nga nagtukod sang puloy-an ang mga apektado nga residente sa kilid sang dalan usar lamang sang trapal.
Nagapadayon ang damage assessment sang Pikit MDRRMO kaangot sa nasambit nga kalamidad.
