KORONADAL CITY – Naglab-ot na sa masobra 100 ka pamilya ang napagkit nga apektado sang baha kag landslide sa tatlo ka Sitio nga sakop sang Barangay Lamlahak, Lake Sebu, South Cotabato.
Ini ang ginkumpirmar ni Rolly Doane Aquino, OIC Provincial Disaster Risk Reduction and Management Officer ukon PDRRMO-South Cotabato sa interview sang Bombo Radyo Koronadal.
Ang mga apektado nga lugar ang ginalakipan sang Sitio Traan-Kini, Sitio Upper Talubek kag Lower Talubek sa nasambit nga banwa.
Suno pa kay Aquino, yara sa 117 ka pamilya ang apektado sang pagkatiphag sang duta kag pagbaha humalin pa kagab-i.
Sa pagkamatuod may natabunan pa nga “bunkhouse” nga ginatulugan sang mga construction workers nga nagakay-o sang dalanon.
Bangud sa hitabo, gilayon nga nagbakwit ang mga pamilya nga apektado kag nagsaylo temporaryo sa Barangay Lamlahak Gym, Lake Sebu Evacuation Center kag Lake Sebu Gym.
Sa subong, nagapadayon ang clearing operations sa lugar kag ginahibalo man ang kabug-usan nga damyos sang kalamidad.
Samtang, padayon ang pagbubo sang ulan indi anay pahanugutan nga makapauli sa ila nga mga puluy-an ang mga apektado nga pamilya.
