KORONADAL CITY – Nagapanawagan subong ang mga health authorities sa masobra 100 ka mga Islam missionaries nga kaupod sang 215 preachers nga nagtambong sa religious gathering sa Malaysia kaupod ang duha ka nagpositibo sa COVID-19 nga makig-angot gilayon sa ila.
Ini makaligad nga magpositibo sa coronavirus infection ang duha sa mga ini kun diin isa na ang ginbawian sang kabuhi sa Amai Pakpak Hospital sa Marawi samtang ang isa pa ang naka-confine subong sa Cotabato Regional Medical Center sa Cotabato City.
Ang 215 ka mga Filipino Islam preachers ang nagpadulong sa Malaysia sang nagligad nga bulan nga nagikan sa lima ka probinsiya nga sakop sang BARMM.
Matapos makumpirmar nga nagpositibo sa coronavirus ang isa ka PUI sa Cotabato Regional Medical Center, gilayon nga ginpatuman ang lockdown sa Cotabato City bilang precautionary measure kun diin nagapatuman naman sang curfew gikan alas-8:00 sang gab-I tubtob alas-5:00 sa aga.
Kadungan sini, nagapanawagan sang paghangop kag kooperasyon ang Cotabato City Government sa mga naapektuhan sang ginapatuman nga lockdown.
Sa interbyu sang Bombo Raydo Koronadal kay Rasalan, ginpahayag sini nga ginahingyo nila sa mga pumuluyo labi na sa mga himata sang nasambit nga mga religious lider nga ipahibalo ang ila mga nahamtangan.
Ini sa tinutuyo nga indi na magdamo pa ang malatnan sang COVID-19.
