KORONADAL CITY– Nag-apela si South Cotabato Governor Daisy Avance-Fuentes sa Duterte administration pinaagi kay Presidential Adviser on the Peace Process Sec. Jesus Dureza nga mabuligan ang masobra 100 nga pamilya nga Muslim nga kasamtangan nga wala sang maistaran subong sa Brgy. Ned Lake Sebu South Cotabato.
Ini makaligad maapektuhan ang mga ini sang nagapadayon nga insurhensya sang komunista kag rebelde nga New People’s Army.
Nahibaluan nga bangud sa kinagamo nagbakwit ang ini apang makaligad ang kinagamo nagdesisyon nga magbalik sa ila lugar apang gin-ukupar na ang ila mga kadutaan sang pila ka mga lumad kag kristyano nga ala sang pormal nga puluy-an.
Sa karun nagapabilin ang mga ini sa temporaryo nga mga gina-istaran apang hingyo nga makabalik sa ila mga kadutaan.
Sa oras naman nga mamilit ang mga ini nga mabawi ang ila mga kadutaan posible mag ibwal ang panibag-o naman nga kinagamo sa nasambit nga banwa.
Nahibaluan nga wala man sila nakabaton sang bulig halin sa PAMANA program para sa mga apektado sang kinagamo sa nasambit nga lugar.
