Ginkumpirmar ni Natthapark Kamkart, tag-iya sang bantog nga Intern Lamphun crocodile farm sa northern Lamphun sang Thailand, nga nadesisyonan niya nga ipaihaw ang masobra 100 ka mga buaya agud nga malikawan ang pagpalagyo sang mga ini kasunod sa wala untat nga pagbaha sa lugar nga nangin rason kon ngaa nagaamat-amat tiphag ang pader sang farm.
Paagi sa isa ka Facebook post, ginpaathag ni Kamkart nga bangud sa mabaskog nga pagbubo sang ulan nga nagresulta sa pagbaha sa mga nagliligad nga inadlaw, nagakaguba na ang pila ka mga parte sang ila farm.
Angot sini, nagdesisyon nalang sia nga ipaihaw ang mga buaya bangud pananglitan nga ma-collapse ang ila mga pader, makapalagyo ang mga kasapatan kag mahimo makapanghalit sa mga tawo.
Gin-ako man sang tag-iya nga nangin mabudlay para sa iya ang ginhimo nga desisyon bangud nga sia mismo ang nagatatap sa mga ini sa masobra 17 na ka tuig.
Suno kay Natthapark, may kabug-osan nga 700 tanan ka mga buaya ang yara sa ila nga crocodile farm.
