KORONADAL CITY- Ginpasiguro sang kongreso paagi kay Deputy Speaker for Mindanao kag South Cotabato 2nd District Representative Atty. Ferdinand Hernandez nga mas magabubo pa ang mga proyekto sa Marawi kadungan sang ikaduha ka tuig nga anibersaryo sang Marawi Siege.
Sa eksklusibo nga interbyu sang Bombo Radyo Koronadal kay Rep. Hernandez, ginpahayag sini nga wala nagpabaya ang gobyerno sa idalom sang Duterte administration agud nga mabuligan na makabangon kag makabalik sa normal ang pagpangabuhi sang mga taga Marawi makaligad ginsakop sang ISIS-MAUTE terror group ang nasambit nga syudad.
Sa pihak sang madulom nga bahin sang maragtas sang Marawi, mas makapamaayo suno pa nga mag move on na sa nasambit nga makangilidlis nga insidente kag huna hunaon ang mas makapaayo para sa mga taga Marawi kag buligan sila nga maangkon ang mas maayo kag luwas nga pagpangabuhi.
Dugang pa nga gin awhag man sini ang mga pumuluyo sang Marawi nga magbuligay ilabi na sa pagbantay sang seguridad agud indi na maliwat pa ang nasambit nga panghitabo.
