Ginpahayag sang isa ka abogado nga kinahanglan sang mas klaro nga aksyon kag dugang nga suporta gikan sa gobyerno agud masabat ang mga kabalaka sang publiko sa nagkalain-lain nga sektor.
Sa interview sang Bombo Radyo Koronadal kay Atty. RJ Sustiguer, presidente sang Integrated Bar of the Philippines, iya ginpabutyag ang iya mga suhestyon kag kabalaka bahin sa edukasyon, healthcare kag agrikultura, nga iya ginakabig nga kinahanglan hatagan sang mas dako nga atensyon.
Sa sektor sang edukasyon, ginpahayag niya ang iya kabalaka sa posible nga pagnubo sang pondo ukon suporta para sa UniFAST kag Tertiary Education Subsidy nga mahimo makaapekto sa madamo nga estudyante sa kolehiyo.
Ginpanawagan niya ang paghatag sang alternatibo nga programa para sa mga benepisyaryo nga mahimo maapektuhan sang pagbag-o sa bulig pinansyal.
Ginkilala man niya ang pagpadayon sang classroom construction, apang ginpahanumdom nga kinahanglan makita ang aktuwal nga resulta sini kag mahibaluan kun pila na ang nagnubo sa kakulang sang classrooms sa bug-os nga pungsod.
Gindugang ni Sustiguer nga dapat mapabakod ang kooperasyon sang gobyerno kag pribado nga sektor sang edukasyon, labi na sa senior high school kag technical-vocational training, agud mapalapad ang mga oportunidad para sa mga estudyante.
