Gin-kumpirma sang Philippine Statistics Authority (PSA) nga wala sang “Mary Grace Piattos,” isa sa mga ginatudlo nga nakabaton sang confidential funds sa idalom sang programa sang Office of the Vice President (OVP), kag ini nag resulta sang pagkabalaka sa mga mambabatas sa Kamara sang mga Representante nga naghimo sang eskema ang OVP gamit ang mga peke NGA pangalan para ma-justify ang ila paggasto.
Suno kay PSA Undersecretary Claire Dennis Mapa nga wala sang makit-an ang ahensya nga birth, marriage ukon death certificate sa ngalan nga “Mary Grace Piattos.
Nakaagaw sang atensyon sang bug-os nga pungsod angpa ngalan matapos nga nagbutyag ang mga dokumento sang Commission on Audit (COA) nga ang isa ka “Mary Grace Piattos”—nga daw pareho sang paghiusa sang popular nga cafe kag brand sang chips—ang nagpirma sa acknowledgment receipt para sa P70,000 nga balor sang “mga bulong” nga may petsa sang Disyembre 30, 2022.
Nagakahulugan ini nga nakabaton si Piattos sang bahin sa P125-milyon nga confidential funds nga gingasto sang OVP sa sulod lang sang 11 ka adlaw, nga ginaimbestigahan subong sang House panel.
