Nagpatuman sang emergency martial law sa South Korea ang South Korean President Yoon Suk Yeol sang alas 11 sang gab-i sang Disyembre 3, 2024 apang gin bawi ini subong ng aga.
Ang nasambit nga pagbawi nagasunod sa pagpasa sang mosyon sang South Korean parliament sa ginpatigayon nga National Assembly nga nagahingyo sang pagkakas sang nasambit nga Martial Law.
Suno kay Yoon, magatubag siya sa desisyon sang mga mambabatas, gani gin-utos niya nga ang mga militar magbalik na sa ila kampo.
Makakas lang ang Martial Law pinaagi sa pagsinapol sang State Council ukon gabinete.
Sa subong nga aga, ang pag-convene sang State Council gina-implementar kag kinahanglan ang quorum para sa pag-apruba sang nasambit nga resolusyon.
Nagapanawagan man si Yoon sa National Assembly nga untaton na ang mga wala sing pulos nga tikang, pareho sang pagliwat liwat nga panawagan sang impeachment, legislative manipulations, kag budget manipulation nga nagaguba sa hulag sang estado.
