Ginlunsyar ni Presidente Ferdinand Marcos Jr. ang Department of Budget and Management (DBM) – Centralized Open Monitoring Platform for Appropriations and Spending Statistics (COMPASS), nga isa ka online platform nga magapahapos sa pagbantay sang publiko sa paggastos sang gobyerno.
Kadungan sini, ginlunsyar man ang Philippine Public Financial Management Reform Roadmap 2024 tubtob 2028 agod mas mapabaskog pa ang maayo kag tampad nga pagdumala sa pondo sang pungsod.
Suno sa presidente, kwarta sang mga Pilipino ang ginagamit sang gobyerno gani dapat maathag kag bukas kon sa diin ini nagakadto.
Sa DBM COMPASS, makita sang publiko kon pila ang budget sang kada ahensya kag kon paano ini ginagastos.
Pahayag ni Marcos, nga makabulig ang sistema agod masiguro nga nagakadto ang pondo sa mga serbisyo nga kinahanglan sang publiko lakip na ang pagpatukod sang mga eskwelahan, pagpatahum sang mga ospital, suporta sa mga mangunguma kag mangingisda, mga proyekto nga pang-imprastraktura, kag pagpanagtag sang ayuda.
Ginmanduan man ni Marcos ang tanan nga ahensya sang gobyerno nga siguruhon nga maayo ang paggamit sang pondo agod mapadasig man ang pagpatuman sang mga proyekto.
