KORONADAL CITY – Natalana nga igadul-ong sa ulihi nga palahuwayan si Teresito “Fr. Chito” Suganob subong nga adlaw, Agosto 3.
Gani subong pa lamang hugot na ang preparasyon nga ginapatigayon sang pamilya ni Fr. Tisoy para sa natalana nga lubong sini.
Kaangot sini ginalauman man ang pagdagsa sang mga pumuluyo nga magapakigbuylog sa kasubo sang pamilya Suganob.
Kun madumdoman, nagtaliwan si Fr. Chito sadtong Hulyo 22 bangud sa atake sa kurason.
Nagserbe ini bilang pari sa Prelature of Marawi, kag nangin Vicar General of Marawi, bilang tuo nga kamot ni Marawi Bishop Edwin dela Peña.
Sang nag-ibwal ang pag-atake sang ISIL-linked Maute kag Abu Sayyaf group sa nasambit nga siyudad sadtong Mayo 23, 2017 , kalakip si Fr. Chito sa 23 nga mga ginhostage sang Maute kag ginapanawagan ang pag-isol sang mga suldado sa nasambit nga lugar, base sa nangin demanda sang mga terorista.
Makaligad ini nga naluwas, temporaryo anay ini nga nagpahuway kag nagbalik sa iya serbisyo bilang pari tubtob sa ulihi nga mga tinion.
