KORONADAL CITY – Tigayon na nga gindul-ong sa ulihi nga palahuwayan ang ginakabig nga 2017 Marawi siege survivor kag ginarespeto nga pari nga si Father Teresito ” Tisoy” Soganub.
Takna alas 10 sa aga kahapon, Agosto 3, sang ginlubong ini sa Norala Public Cemetery kun sa diin gintambongan ini sang iya mga kasimanwa sa banwa sang Norala.
Kaangot sini, nagpasalamat naman ang utod sini nga si Boyet sa mga nakig-unong sa ila kasubo kag sa mga nag-upod sa ila pagpanalambiton.
Nagtaliwan si Fr. Chito bangud sa balatian nga kurason kag wala na sang kabuhi sang nasapwan ini sang iya pamilya sa ila panimalay.
Kun madumdoman nga isa si Fr. Chito sa mga ginhostage sang ISIL-linked Maute group sa una nga mga semana sang giyera sa Marawi City sadtong Mayo 2017.
Tigayon ini nga na-rescue kag nagpaidalom sa therapy agud makarekober sa trauma nga iya nga naeksperyensiyahan, antes nagbalik sa serbisyo bilang pari tubtob sa ulihi nga tinion sini.
