KORONADAL CITY – Ginpetisyunan sang mga estudyante kag ginikanan sang Tantangan National Trade High School (TNTHS) sa isa ka manunudlo bangud sa madamo suno pa nga mga aligasyon batuk sa iya.
Sa interbyu sang Bombo Radyo Koronadal kay alyas Ian, SSG President sang nasambit nga buluthuan, isa sa mga rason ngaa ginpetisyunan nila si Ginang Haydee Paterno amo ang pagpamahog suno pa sini sang bagsak nga grado sa mga estudyante, apisar nga wala man ini sang madalom nga rason.
Dugang pa ni Ian, ginbutang sa gate sang ila eskwelahan ang tarpaulin kun diin nakabutang ang mga reklamo batuk kay Ginang Paterno.
Wala suno pa ini nagatudlo sang maayo kag halos istorya sa kabuhi sini ang iya ginatalakay sa iya mga estudyante.
Dugang pa nga lain ang ginadiscuss, lain man suno pa nag nagaguwa sa eksaminasyon; kun magrereklamo ang mga kabataan ginainitan niya; masami nga nagapanghadlok nga ibagsak ang estudyante; bag-o mag-pandemic, ginapautang sini ang mga bata sang baligya nila nga mag-asawa kag kun indi makabayad ginapahog nga ibagsak sila sa exam.
Suno pa sa mga reklamante, sang October 27, 2022 ginpaguwa niya ang masobra 25 ka estudyante sa Grade-9 Lagos. kag ginpapuli bangud wala daw sang insakto nga haircut apisar nga indi man daw mataas ang buhok nila.
Kag madamo pa nga mga reklamo batuk sa maestra.
Ginapanawagan man sang mga ini nga pahalinon sa eskwelahan si Paterno.
Nahibaluan nga nagpatigayon sang protest sa atubang sang buluthuan ang mga ginikanan kag nagapangabay sa principal nga pahalinon ang nasabit nga manunudlo.
Nagdepensa naman ang buluthuan kag ginpahayag nga napalab-ot na sa Division Office sang DepED South Cotabato ang reklamo kag padayon nga gina-imbestigaran ang manunudlo.
Sa interview naman sang Bombo Radyo Koronadal kay Ms. Rhean Sevillano-Haleque, information officer sang DepEd-12 nasubuan sila sa kasubong indi husto nga proseso sang pagreklamo sa manunudlo apang nagpasalig ini nga kun makaabot na sa regional office ang reklamo, pagahatagan ini sang gilayon nga atensiyon.
Tubtob sa karon wala pa man sang may ginpaguwa nga statement ang manunudlo sa mga akusasyon batuk sa iya.
