Makasubo ang natabo sa isa ka maestro matapos siya ginluthang sang iya mismo nga estudyante sulod mismo sa campus sang Balabagan Trade School sa Barangay Narra, Balabagan, Lanao del Sur.
Suno sa mga otoridad, nag-umpisa ang insidente matapos gindiskubre nga ginpabagsak sang biktima nga si Danilo Barba, 34 anyos, si alyas Kaizer, 20 anyos kag Grade 11 student sa isa ka subject.
Suno sa Balabagan Municipal Police Station, gin-ako mismo sang suspek ang krimen bangud sa dakô niya nga kasuko sa maestro nga nagpabagsak sa iya.
Base sa imbestigasyon, pasado alas 8:00 sang aga sang Agosto 4, 2025, natabo ang insidente.
Pa-eskwela pa lang tani si Barba sang ginsugat siya sang suspek kag ginluthang sa ulo gamit ang isa ka kalibre .45 nga pistola, nga amo ang rason sang iya gilayon nga kamatayon.
Pagkatapos sang krimen, nagtago ang suspek sa ila paryente sa Marogong. Apang, sa bulig sang iya utod nga isa ka pulis, nagsungka siya sa otoridad sa masunod nga adlaw.
Gin-athag man nga indi lang si Barba ang maestro nga nagpabagsak sa suspek, kag may iban pa ini nga mga maestro nga posibleng target. Pero ginpanindugan sang suspek nga si Barba lang ang iya ginakainit-an.
Sa subong, may mga gin-deploy na nga kapulisan kag kasundaluhan agud magbulig sa pagbantay sa eskwelahan.
