KORONADAL CITY – Ginpaidalom na sa imbestigasyon ang isa ka manunudlo nga nagpanakit sang isa ka estudyante sa Tina Elementary School sa siyudad sang Tacurong.
Nangin trending man sa social media ang naglapta nga laragway sang nasambit nga bata nga nakaangkon sang pilas bangud sa pagpangkusi sang manunudlo nga ginkilala kay Teacher Susan Pillorato.
Samtang, matapos mabatian sa Bombo Radyo Koronadal, gilayon nga ginpalantaw ni Tacurong City Schools Division Supt. Leonardo Balala ang sitwasyon sang nasambit nga bata kag ginmandu nga isaylo sang buluthuan ang nasambit nga manunudlo epektibo subong nga adlaw sang Lunes, Disyembre 4, 2017.
Kaangot sini, apisar nga wala na ginpursige sang pamilya sang grade 3 pupil ang reklamo, nagapadayon naman ang imbestigasyon bangud kun mapamatud-an magapangatubang sa kaso nga administratibo ang nasambit nga guro.
