KORONADAL CITY- Mas nagbudlay pa ang sitwasyon kag kapit-os nga ginabatyag sang mga mangunguma sa pungsod kung ipadayon ang pagsaka sang presyo sang sibuyas kag maga import na naman.
Ini ang pagpati ni Mr. Leo Fuentes, Regional Coordinator sang MASIPAG Mindanao sa interview sang Bombo Radyo.
Suno kay Fuentes, bangud sa sini nga panghilitabo — indi manami nga tikang ang permi na lang nga pag-import o kun pagplano nga pag import sang produkto.
Amo gani suno kay Fuentes, ginaduso nila sa Marcos administration ilabi na sa Department of Agriculture nga pagahatagan sang nagakaigo nga solusyon- agud nga indi man lugi ang mga mangunguma.
Kaangot sini, nagalaum ang MASIPAG nga masolusyonan sang madason ng administrasyon ang problema sang mga mangunguma ilabi na sa access sa mas manubo nga serbisyo, pestisidyo, abono kag teknolohiya.
