KORONADAL CITY – Nagapanawagan ang mga katapo sang Tupi PNP sa posibilidad sang makatudlo sa suspek sang pagpangluthang nga nagluntad sa Brgy. Polonuling.
Suno kay Tupi PNP Chief of Police P/Major Verlin Pampolina nga nagahingyo sila sang kooperasyon sa mga pumuluyo ilabi na sa mga nakakita sang pagpangluthang nga makig-angot sa ila nga talatapan agud nga mas madasig nga masolbar ang kaso kag makabulig sa pamilya sang biktima.
Dugang pa ni Major Pamploina nga sa subong padayon man ang mas ginpahugtan nga seguridad sa banwa sang Tupi agud nga indi na masulit pa ang masambit nga krimen kag agud mamonitor man ang pila ka mga indi maayo nga hilikuton sang pila ka mga indibidwal sa ila nga nasakupan.
Madumdoman nga ginluthang ang isa ka mangunguma nga si Hernancia Kor, 58 anyos samtang padulong ini sa iya nga umahan.
Ginpahayag ni Pampolina nga yara sa tatlo ka persons of interest ang ila ginaimbestigaran kun sa diin personal grudge ang ginalantaw nga motibo sa pagpangluthang.
