KORONADAL CITY – Arestado kag nakuhaan sang armas kag droga ang isa ka Street Level Individual sa iya puluy-an sa ginpatigayon nga Search Warrant Operation sang Kidapawan PNP sa Purok 2, Brgy Sumbac, Kidapawan City subong nga adlaw sang Huwebes, ika-10 sang Oktubre 2024.
Ginkilala ni PLTCOL DOMINADOR L PALGAN JR, Hepe sang Kidapawan City Police Station ang naaresto nga si alyas “Mar” 38-anyos, may asawa kag residente sang nasambit nga lugar kag ginakabig nga isa ka Street Level Individual.
Suno kay PLTCol Palgan, ginpatigayon ang search warrant operation ala-1:50 sang kaagahon sang mga tinawo sang Kidapawan City Police Station Drug Enforcement Unit (DEU), kaupod ang RSOG 12, 1ST CPMFC, RMFB12 Tracker team, NCPHPT HPG Kidapawan kag PPDEU.
Nakuha sang mga otoridad ang lima ka heat-sealed transparent plastic sachet nga ginapatihan nga shabu nga may kabug-aton nga 2 gramo kag may SDP nga Php 60,000. Narekober man ang isa ka unit sang Cal.38 revolver kag apat nga ammunitions.
Sa karon nagapangatubang ang suspek sa paglapas sa RA 9165 ukon Comprehensive Dangerous Drugs Act of 2002 kag paglapas sa RA 10591 ukon The Comprehensive Firearms and Ammunitions Regulation Act.
