KORONADAL CITY- Nagapadayon ang imbestigasyon sang kapulisan sa pagpangluthang-patay sa manager sang isa ka financing company sa banwa sang Banga, South Cotabato pasado alas 2:00 kaina sang hapon.
Ginkilala ang biktima nga si Emil Soriano Soteral, 48, isa ka financing manager sang Radiowealth Finance Company Inc. sa banwa sang Surallah.
Sa interbyu sang Bombo Radyo Koronadal kay PSSUPT. Franklin Alvero, provincial director sang South Cotabato, nagamaneho sang motorsiklo nga may plate number nga 5156 YW ang biktima padulong sa siyudad sang Koronadal sang ginsundan sang riding in tandem kag pag-abot sa Crossing Kipot, Barangay Rizal Poblacion, ginluthang ini sang mga suspek.
Nakaangkon sang 5 ka igo sang bala sa lawas ang biktima nga gintunaan sang iya gilayon nga kamatayon.
Sa subong, ginahibalo pa sang kapulisan ang motibo sang krimen kag identity sang mga suspek.
