KORONADAL CITY– Nagpanawagan pinaagi sa Bombo Radyo ang malapit nga abyan sang isa sa pito ka mga Filipino seafarers nga kasali sa mga ginkidnap sang mga rebelde sa isa ka Swiss merchant vessel sa Southern Niger Delta region sa West Africa.
Sa ekslusibo nga interbyu sang Bombo Radyo Koronadal kay Mark John Valdez, kalakip sa 7 ka mga pinoy ang bestfriend sini nga si Gideon Puada, 28 anyos sa mga ginkidnap sang mga pirata mangin man ang 5 pa ka mga dumuluong nga kaupdanan sini sa trabaho.
Nahibaluan nga taga Brgy. GPS, Koronadal City si Puada kag madugay naman sa iya nga trabaho sa Massoel Shipping.
Kun madumduman nga gin-atake sang mga pirata ang MV Glarus 45 nautical miles, sa south west sang Bonny Island kun sa diin ginpangluthang sang mga ini ang barko kag gindala ang 12 crew members lakip na ang 7 ka mga pinoy seafarers samtang maswerte nga nakapalagyo ang iban pa.
Sa karun nagapakig-angot na ang Massoel Shipping sa mga otoridad agud mapasiguro ang kaluwasan sang mga ini kag mahilway sila.
Nahibaluan nga nagadata ang kidnap-for-ransom sa Nigerian waters.
