Matapos ang sunod-sunod na pagtaas ng presyo ng langis sa mga nagdaang linggo bunsod ng tensyon sa Middle East, inaasahang magkakaroon ng malaking rollback sa produktong petrolyo sa darating na linggo, ayon sa Department of Energy.
Ibinahagi ni Sharon Garin na posibleng bumaba ang presyo ng diesel ng hanggang P20.89 kada litro, habang P4.43 naman ang inaasahang bawas sa gasolina at P8.50 sa kerosene. Target ipatupad ang rollback mula Abril 14 hanggang Abril 20.
Ipinaliwanag ni Garin na ang pagtatayang ito ay nakabatay sa galaw ng international oil prices sa nakalipas na limang araw kumpara sa presyo noong nakaraang linggo. Bagama’t maaari pang magbago ang aktwal na presyo depende sa gasolinahan, ito na ang inaasahang pinakamababang ibabawas.
Malaking tulong ang inaasahang pagbaba ng presyo para sa mga sektor na lubhang apektado ng mataas na krudo, kabilang ang transportasyon, agrikultura, at pangisdaan. Inaasahan din na makapagbibigay ito ng bahagyang ginhawa sa gastos sa produksyon at maaaring makatulong sa pagpreno ng pagtaas ng presyo ng mga pangunahing bilihin.
