Walang interes ang Malacañang na bigyang pansin ang plano ni Cavite Representative Elpidio “Kiko” Barzaga Jr. na maghain ng impeachment complaint laban kay Pangulong Ferdinand “Bongbong” Marcos Jr.
Ayon kay Undersecretary Claire Castro, Palace Press Officer, abala ang Pangulo sa pagtupad sa kanyang mga tungkulin at pagtutok sa mga mahahalagang programa ng administrasyon, tulad ng pagpapababa ng presyo ng bilihin, pagpapatatag ng ekonomiya, at pagpapabuti ng serbisyo sa publiko.
Giit ni Castro, walang saysay na pagtuunan ng pansin ang mga isyung itinuturing ng Palasyo na pampulitikang ingay lamang.
Aniya, “Marami pang mas mahalagang dapat gawin ang Presidente kaysa pagtuunan ng pansin ang mga ganitong isyu.”
Dagdag pa ni Castro, nananatiling nakatuon si Pangulong Marcos sa kanyang mga layunin para sa bansa at hindi naaapektuhan ng mga akusasyon o panawagang may halong pulitika.
Samantala, hindi pa nagbibigay ng pahayag si Barzaga hinggil sa kung kailan niya planong ihain ang reklamo, ngunit sinabi niyang ito ay may kaugnayan umano sa ilang isyung bumabalot sa kasalukuyang administrasyon.
Sa kabila nito, nanindigan ang Malacañang na mananatiling kalmado at nakatuon sa trabaho si Pangulong Marcos Jr. sa kabila ng mga hakbangin ng oposisyon.
