KORONADAL CITY– Posible suno pa nga nagapati ang National Government nga may yara sang ginaluto nga destabilization plot batuk sa administrasyon nga idungan sa mga rally sang grupo nga Pinagkaisang Samahan ng mga Tsuper at Operator Nationwide (PISTON).
Ini ang ginpahayag ni South Cotabato Governor Daisy Avance-Fuentes sa interbyu sang Bombo Radyo Koronadal kadungan sang liwat naman nga pag-anunsyo sang Malacañang sang liwat nga pagkanselar sang klase kag trabaho sa mga pampubliko nga buluthuan kag talatapan subong nga adlaw.
Apang sa pihak nga bahin, ginpahayag sini nga iya nakit-an nga wala sang magasuporta sa destabilization plot sa Duterte Administration apisar may mga reklamo bangud nagapati ini nga ang mga pinoy ang may malaba nga tolerance sa gobyerno.
Samtang ginkumparar pa sini ang natabo sa rehimeng Marcos nga nagalab-ot pa sa duha nga dekada sadto antes nga naghulag ang tanan.
Dugang pa sini nga yara pa lamang sa isa ka tuig si Presidente Duterte kag indi tanan sang inahimo sini ang malain rason nga dako ang iya pagpati nga hatagan ini sang tiyansa sang mga pinoy.
Sa pihak nga bahin, nagpahayag naman ini nga nanugon ang adlaw ilabi na sa ila ng mga yara sa gobyerno bangud lamang sa cancellation of work and classes bangud sa madamo nga trabaho apang wala suno pa sila sang mahimo sa baylo nga magsunod sa kamanduan sang National Government.
