May kinamatarong angn Office of the President nga makaangkon sang confidential kag intelligence funds labi na si Pangulong Ferdinand Marcos Jr ang commander-in-chief kag chief architech sang national policy kag national security.
Ginpahayag ni Palace Press Officer USec Claire Castro nga kinahanglan sang pondo sang Pangulo para sa mga aktibidad kag proyekto nga may kahilabtanan sa pagbantay sa seguridad sang pungsod.
Sabat ini ni Castro matapos kuwestyunon sang pila ka kritiko ang ginaproponer nga confidential kag intelligence funds sang Office of the President, sa idalom sang 2026 National Expenditure Program.
Ginpunto pa ni Castro nga indi malain ang confidential kag intelligence funds kun ini ang pagausaron sa tama.
Nangin malain lamang ini kun ginagamit sa mali sang isa ka corrupt nga opisyal.
Suno sa DBM, nagnubo sa 11 porsiyento ang alokasyon sang CIF sa ginaduso nga 2026 national budget.
Sandig sa 2025 General Appropriations Act yara sa P12.1 billion ang pondo para sa confidential and intelligence funds.
Sa pihak nga bahin, ginsabat man sang Palasyo ang banat ni anay Finance Usec. Cielo Magno, nga wala sang kinalain si Pang. Marcos, Jr. kay Vice President Sara Duterte, kun padayon man siya nga magahingyo sang confindential kag intelligence funds, sa pihak sang kamatuoran nga mahimo makurakot ang nasambit nga pondo.
Sa idalom sanng hagna nga 2026 national budget yara sa P10.77-billion ang alokasyon para sa confindential kag intelligence funds, kun diin yara sa P4.5-billion ang napain sa Office of the President.
Ang National Intelligence Coordinating Agency ang may hyara sang P1.1 billion CIF, ang DND ang may P1.8 billion samtang ang P2.2billion ang gintunga sa Anti-Money Laundering Council, National Security Council kag Philippine National Police (PNP).
Nangin kontrobersiyal ang confidential kag intelligence funds matapos mahibaluan nga sala ang pag-gasto sang Office of the Vice President kag sang Department of Education sa idalom sang pagpamuno ni VP Sara Duterte.
