Ginpaathag sa liwat sang Malacañang nga wala sing halo nga pamulitika ang paglunsyar sang 20/kilo nga programa nga bugas sang gobyerno.
Ini ang sabat sang Palasyo matapos kwestyunon ni Vice President Sara Duterte ang timing sang proyekto nga pila ka semana antes sang midterm elections.
Suno kay Palace Press Officer Claire Castro, ang paghatag sang subsidiya para sa barato nga bugas wala nakabase sa eleksyon, kundi sa kinahanglanon sang mga pumuluyo, labi na ang mga pigado.
Suno kay Castro, wala sang “timing” nga ginatan-aw sa paghatag sang bulig.
Ginpaathag man ni Castro kon ngaa wala deretso napatuman ang programa matapos ang kampanya sang Presidente sang 2022 Presidential Election, bangod kinahanglan ang maayo nga pagtuon kag koordinasyon sa tunga sang national government kag mga lokal nga talapatapan.
