KORONADAL CITY – Ginaawhag sang Obispo sang Diocese of Marbel ang tanan nga mga tumuluong Katoliko nga magpuasa, magpamalandong, magpangamuyo kag magbulig sa mga imol indi lamang sa adlaw sang Badlis kundi sa bug-os nga kasaulugan sang Lent.
Ini ang kabahin sang mensahe ni Bishop Cerilo Casicas, Obispo sang Diocese of Marbel kadungan sang Ash Wednesday.
Sa iya nga homily, ginhatagan punto sang Obispo ang tanda sang pagsugod sang kuwaresma nga dapat mangin maisog ang kada isa sa pagkilala sang sala, pagpangayo sang kapatawaran kag paghinulsol sini.
Dako man nga hangkat sa tanan ang pagbag-o nga magasugod sa tagsa ka kaugalingon, komunidad kag bug-os nga pungsod.
Gindugang pa sini nga indi dapat magpangibabaw ang pangkaugalingon nga interes nga nagatuga sang giyera sa mga kapungsuran, issue sang pulitika sa aton nga pungsod kag social concerns kasubong sang pag-guba sa kinaiyahan agud magbinahin-bahin ang katawhan sa baylo, kilalahon kag respetuhon ang kada isa apang i-assess man kun ano ang aton kontribusyon sa kasamtangan nga sitwasyon sang pungsod.
