KORONADAL CITY – Magapangatubang sa kaso nga homicide ang magpakaisa nga lalaki nga ginakabig nga nagapanguna nga mga suspek sa pagpaglugos-patay sa isa ka 15-anyos nga dalagita sa Barangay Maligo, Polomolok, South Cotabato.
Suno kay PCOL Samuel T. Cadungon, provincial director sang South Cotabato, ang mga suspek ang yara na sa kustodiya sang Polomolok PNP matapos sila ma-identify nga ulihi nga nakaupod sang biktima kag base man sa natipon nga ebidensya kag pahayag sang mga testigo.
Naguwa sa imbestigasyon nga magkaupod ang duha ka suspek kag ang biktima sa isa ka okasyon sang gab-i sang Enero 13, upod ang iban pa nga mga indibidwal.
Gin-identify man sang pila ka testigo nga ang isa sa mga suspek amo ang ulihi nga nakita nga kaupod sang biktima sang hapon sang Enero 14, kag pagkabuwas, Enero 15, natukiban na lang ang iya lawas sa plantasyon sang pinya.
Ginapatihan sang mga otoridad nga ginlugos anay ang biktima antes siya ginpatay, bangud wala siya sang panapton sa idalom sang iya lawas sang natukiban.
Samtang ang mga nadakpan nga suspek may mga pilas man sa nagkalain-lain nga parte sang lawas, kag narekober man sa crime scene ang bayo nga ginsuksok sang isa sa ila antes natabo ang krimen.
Sa subong, ginapreparar na ang kaso nga homicide nga ipasaka batok sa mga suspek, samtang posible madugangan pa sang kaso sang rape depende sa resulta sang autopsy.
Madumduman nga sa interview sang Bombo Radyo sa lolo sang biktima, ginpahayag sini nga nagpaalam ang dalagita nga maligo sa swimming pool sang Enero 13, apang wala na siya nakapauli kag natukiban na lang nga patay na ini.
Ginapanawagan naman sang pamilya sang biktima ang hustisya, kag indi lang sila kuntento sa pagkadakop sa mga suspek.
