NORALA, SOUTH COTABATO – Tigayon na nga ginbawian sang kabuhi ang maglive-in partner nga ginpangluthang-patay sang riding-in-tandem sa banwa sang Norala, South Cotabato alas 12:35 sang udto, Huwebes nga adlaw, Disyembre 5,2024.
Ginkilala ang mga napatay nga sanday Romel Crisostomo, 37-anyos, mangunguma kag live-in partner sini nga si Gina Bansil, 37anyos nga lunsay mga residente sangn Sitio El Kuda, Barangay Puti, Norala, South Cotabato.
Sa interview sang Bombo Radyo Koronadal kay PCAPT. Nepthalie P. Bedua Jr, deputy chief of police sang Norala PNP natumod na nila ang suspek sa krimen bangud may testigo suno pa nga nagtudlo diri kag may ginauyatan naman sila nga ebedensiya lakip na ang CCTV footage.
Naguwa suno pa sa imbestigasyon sang mga otoridad nga duha ang mga suspek nga responsable sa krimen kun diin nakilala na ang isa sa mga ini kag ginpahayag nga paryente lamang biktima nga si Crisostomo kag residente man sang nasambit nga lugar.
Apang sa karon, padayon pa ang pagtipon sang ebendensiya kun diin personal grudge angot sa land conflict ang natumod nga motibo sang krimen.
Una diri, ginpahayag naman ni Barangay Kapitan Randy Gardose sang Barangay Puti nga nagluntad ang pagpangluthang sa mga biktima sa Purok Roxas sa nasambit nga banwa samtang papuli ang maglive-in nagikan sa Barangay Poblacion sa pagbaligya sang uling.
Naigo sa nagkalain-lain nga bahin sang iya lawas si Crisostomo samtang sa iban man nga parte sang iya lawas ang si Bansil nga gindala pa sa Hospital apang ginbawian man sang kabuhi.
Suno kay Kapitan Gardose, ikaduha ka beses na ini nga may naghana sa pagpatay sa mga biktima apang nakaluwas ang mga ini.
Samtang, naglunsar naman sang hot pursuit operation ang kapulisan batuk sa nagpalagyo nga suspek nga sakay sang motorsiklo.
