KORONADAL CITY – Pormal na nga gintapos sang magkasumpong nga pamilya sa bahin sang Sultan Kudarat kag South Cotabato ang ila rido makaligad ang apat ka bulan nga pag-inaway.
Suno kay Arvin Librado, focal person for infrastructure sang Provincial Disaster Risk Reduction and Management Office (PDRRMO), nga nagsugot ang mga pamilya kag supporters nanday Mike Binago, Tat Tuan kag Salik Adam nga makaangkon na sang kalinong sa ila lugar.
Ini makaligad nagpatunga si South Cotabato governor Reynaldo Tamayo Jr kag gin-istorya ang duha ka pamilya sa Brgy. Ned, Lake Sebu.
Ginmando man sini ang pag-deploy sang Philippine Army, PNP kag CAFGU sa mga apektado nga area agud maproteheran ang mga residente kag malikawan pa ang paglala sang sitwasyon.
Nagpanagtag man sang bulig ang PDRRMO sang mga pagkaon kag mga commodities sa mga evacuees kasubong sang health kits kag mga kagamitan para sa mga lapsag kag mga kabataan.
Madumdoman nga masobra 260 ka pamilya ang nagbakwit nagikan sa Sitio Molmol, Kisayan kag Kumilat sa Lake Sebu amo man sa Brgy. Molon, Palimbang, Sultan Kudarat bangud sa nasambit nga rido.
