TAMPAKAN, SOUTH COTABATO – Nagapaayo na sa karon ang isa ka lalaki makaligad halos mautdan ini sang talinga makaligad ang nagluntad nga away sa tunga nila nga mag-utod.
Sa impormasyon nga ginpalab-ot sang South Cotabato PNP, ginkilala ang suspek nga si Danilo Casimero, 51 anyos, may asawa kag isa ka farm manager kag residente sang Prk. Riverside, Lampitak, Tampakan, South Cotabato samtang ang mga biktima naman amo sanday Dionito Casimero kag Edgar Casimero.
Base sa imbestigasyon sang Tampakan PNP, nagakay-o suno pa sang ila tindahan ang suspek sang nag-agi ang mga utod sini nga sanday Dionito kag Edgar pauli na kun tani sa ila puluy-an sakay sang ila mga motorsiklo.
Una nga nag-agi suno pa si Edgar kag ginlaga ini sang lagaraw sang suspek apang wala sini naabtan si Edgar samtang nagkuha naman sang bato ang isa pa nila ka utod nga si Dionito ka ginhana nga batuhon ang suspek apang wala maigo.
Naabtan naman sang asawa sang suspek nga si Analiza Casimero ang panghitabo kag nagsali man sa kinagamo kag ginhabuyan ang mga utod sang bana sang martilyo apang wala man sa gihapon maigo.
Ginpulot naman ni Dionito ang martilyo kag ginbato sa suspek nga si Danilo kag naigo ini nga nangin kabangdanan agud labuon sini sang lagaraw ang kaugalingon nga utod nga naigo naman sa dalunggan.
Halos mautod suno pa ang dalunggan ni Dionito apang gilayon naman ini nga nadangat sa balay bululngan.
Land conflict naman ang ginakabig nga kabangdanan sang krimen.
