KORONADAL CITY – Nagapadayon subong ang imbestigasyon sang mga otoridad sa natabo nga pagsalakay sang mga armado nga kalalakihan sa probinsiya sang North Cotabato nga nangin rason sang kamatayon sang isa ka lalaki kag tuman nga pagkapilas sang iloy sini.
Ginkilala ang napatay nga si Kunti Sansawi, 62 anyos samtang pilason naman ang nanay sini nga si Pidsimayo Sansawi, 80 anyos, lunsay mga residente sang Brgy Bualan Pikit North Cotabato.
Suno kay Pikit Chief of Police, Major Mautin Pangandigan, hinali na lamang ginpaulanan sang bala ang puluy-an sang mga biktima sang wala nakilala nga mga armado nga lalaki usar ang M16 Armalite rifles.
Gilayon naman nga nagpalagyo ang mga suspek sang makit-an ang mga nagresponder nga mga Cafgu kag BPAT.
Patay on the spot si Kunti Sansawi samtang yara sa kritikal nga kondisyon ang iya nga iloy nga gindangat sang ila nga himata sa balay-bululngan.
Sa subong, nagapadayon pa ang imbestigasyon sang Pikit PNP sa pagpangluthang sa mga biktima.
