KORONADAL CITY – Nangin madinuagon ang kick-off ceremony sang Nutrition Month subong nga una nga adlaw sang Hulyo.
Ini bangud sa pagpartisipar sang nagkalain-lain nga float nga nagdugang sang kabuhi sa aktibidad nga ginpangunahan sang National Nutrition Council.
Sandig sa Presidential Proclamation No. 491 s.1974 nga ginpirmahan ni anay Pangulong Ferdinand Marcos Sr. ginaselebrar ang Nutrition Month kada tuig pag-abot sang bulan sang Hulyo.
Sa subong nga tuig, ang tema sang Nutrition Month amo ang “ Sa Philippine Plan for Nutrition, sama-sama sa nutrisyon sapat para sa lahat”.
Suno naman kay South Cotabato Governor Reynaldo Tamayo Jr., diri sa probinsiya ginatutukan ini sang Provincial Nutrition Office agud mamonitor ang mga kabataan nga malnourished.
Aminado si Governor Tamayo nga nagakinahanglan sang effort kag nagakaigo nga program agud nga madula na ang mga under-nourished ukon malnourished nga mga kabataan.
Ginpasiguro man ni Tamayo nga nga may mga Barangay Nutrition Scholar nga nakatutok agud mahapos nga ma-identify ang mga kabataan nga nagaedad sang 0-12 nga kulang sang nutrisyon.
Ini nga mga kabataan ang ginapaidalom sa feeding program tubtob nga makuha nila ang insakto nga timbang.
Magluwas sini, may mga nagamonitor man nga mga health navigators agud masiguro nga may nagakaigo man nga programa nga iga-implementar sa tagsa ka barangay para masolbar ang problema sa malnutrisyon sa diin man nga lugar sa probinsya.
