KORONADAL CITY – Mabug-at sa dughan kag sobra ka sakit para sa isa ka bana nga makita nga patay na ang iya asawa matapos nga marekober kaina sang aga sa natiphag nga 3-storey building sa Padada, Davao del Sur.
Sa eksklusibo nga iterbyu sang Bombo Radyo Koronadal sa isa ka Earthquake survivor nga si G.Fructoso Artiaga, siya mismo ang nagkumpirmar nga ang asawa sini nga si Evelyn Artiaga ang isa sa mga bangkay nga narekober bangud sa ginasuksok sini nga green nga t-shirt kag iban pa nga palatandaan sa lawas sini.
Suno kay Fructoso, malipayon pa si Evelyn sa ulihi sini nga pagkakita bangud nagpaalam pa ini sa iya nga magbakal sang makaon.
Nahibaluan nga ang mag-asawa nga Artiaga ang mga residente sang Sulop, Davao del Sur nga kaiping lamang sang Padada, Davao del Sur, nga isa sa pinakaapektado sang magnitude 6.9 nga linog.
Samtang, ginkalipay naman sang mga responders sa nagapadayon nga rescue and retrieval operation sa natiphag nga edifisyo nga may signs of life pa nga nadetect.
Sa eksklusibo nga interbyu sang Bombo Radyo Koronadal kay PRC South Cotabato Chapter Administrator Erwin Del Carmen, apisar nga mabudlay ang ginahimo nila nga rescue kag retrieval operation nangin mahapos na lamang ini sa pagbinuligay sang tanan sa kasubong nga bayanihan system nga nagakatabo.
Magluwas sini may mga specialized equipment man nga ginagamit agud mahibaluan kun may heartbeat pa sa natabunan sang mga debris.
Kaangot sini, nag-apela naman sang pangamuyo ang ang Rescue and Retrieval team sa mga pumuluyo para sa mga apektado sang linog.
