Kasubong sa iban, tuman man ang pasalamat sang isa sa mga national finalist sang 3rd Bombo Music Festival makaligad nga nalakip ang iya song entry sa nasambit nga kompetisyon.
Kaangot sini, ginpakigbahin ni Eugenio Corpuz sang Legazpi City nga mangin inspirado suno pa ang iya song entry nga Run para sa tanan nga makapamati sini.
Ginpahayag ni Corpuz nga nagdaog man sadto bilang finalist sang tinalikdan nga BMF, ang iya ambahanon ang nagatumod sa dalagan sang kabuhi sang tawo, apang dapat nga pamatian na lang agud makuha ang bug-os nga interpretasyon sini.
Para sa iya, ang ikaduha nga tsansa nga makapadulong sa Iloilo City para sa live performance isa man ka oportunidad agud liwat nga makit-an ang iya mga abyan didto.
Nahibaloan nga gin-compose niya ang nasambit nga ambahanon samtang yara siya sa isa ka fastfood chain kag ginsulat niya ang lyrics sa likod sang resibo sini.
Nagapasalamat man siya nga apesar wala siya ginhatagan sang talento sa pag-amba, ginpalibotan naman siya sang iya mga himata kag kaingod nga nakabalo sa pag-amba.
